Abstract: Inunnik isumaginninnermut apeqqutinik politikkeqarneq nunani avannarlerni suleqatigiinnerup iluani nunat inoqqaavinut tunngassuteqartunik aallaaveqarneq takussutissaavoq pitsaaqutitalik: Pineqartut inuit eqimattat amerlasoorsuunngillat, nunani annertuumik unammillernartunik assigiinngitsunik kiisalu innuttamikkut utoqqaliartorfiusunik, sulianillu inuttassaaleqiffiusunik nunallu iluini angissutsimikkut isorartussusaannik unammillernartoqartitsisunik. Nunat avannarlerni puigortunngornermik nappaatinut tunngasunik suleqatigiinnerat, Nordisk velfærdscenterimit suliat ingerlanneqarnerannik aaqqissuisuuffiuvoq, tassanilu paasineqarpoq ilisimasanik katersuiffimmik ataatsimoorussamik aaqqissukkamik pilersitsisoqarnissamik pisariaqartisineq, misilittakkanillu taartsigeeqatigiittarneq aaqqissuunneqartariaqarnera aammalu inuit kalaallit saamillu isumaginninnikkut puigortunngorsimasunut napparsimasunillu paaqqinninnermut pitsaasumik ilioriaasissanut tunngasunik oqalliffimmik pilersitsinissaq. Atugarisat aallaavigalugit ilisimatusarnerit amigaataapput inuit kalaallit saamillu puigortunngornermik nappaatillit isumagineqarnerat paarineqarnerallu pillugit, kisiannili ataasiakkaanik aallartisartoqarpoq Finlandimi, Norgemi, Sverigemi Kalaallit Nunaannilu suliniutinik ilisimatusaatigineqartussanik. Nalunaarusiaq manna suliaavoq nunani avannarlerni nunat inoqqaavi puigortunngornermillu nappaatit pillugit ataatsimeersuarnermit siullermi pisumit , tassani suleqatigiissitat eqimattakkuutaarlunilu sulinermit siunnersuutigineqarsimasut aaliangiussallu najoqqutaralugit. Ataatsimeersuarneq pivoq ukiakkut 2018-mi Östersund-imi (Staare) Nordens Velfærdscenter Jämtland Härjedalenillu kiisalu saamit Staare 2018-mi nalliuttorsiorfittut ukiorititaanut atatillugu aaqqissuussatut. Naggasiullugu aaliangiussat siunnersuutillu ilaatigut tunngassuteqarput suliniutissat allannguutissallu aaliangersimasut suut pisariaqartinneqarnersut inuit nunat inoqqaavi puigortunngornermit nappaateqalersimasut nunani avannarlerni kommunini pitsaanerusumik sullinneqarnissaat anguniarlugu, taakkulu akornanni qanoq misilittakkat ilisimasallu nutaat siammarsarneqarsinnaaneri anguneqassasut. Suleqatigiissitat isummersuutaat Nordens velfærdscenterimit katiterneqarsimapput, kisianni suliassat qanoq tulleriiarneqassanersut imaluunniit suut pingaarnerutinneqassanersut uagut aaqqissuisutut aaliangiiffigineqanngilaq. Nalunaarusiaq oqaloqatigiinnissamut oqallinnernilu tunuliaqutassatut suliaavoq tassuuna nunani avannarlerni suleqatigiinnermi nunat inoqqaavi puigortunngornermillu nappaateqarneq pillugu suliassanik pingaarnersiuinissamik, kommunini nunanilu tamakkerlugu ingerlanneqarsinnaasumik. Siunnersuutit tunuliaqutassaannik nalunaarusiaq aallartippoq nunat inoqqaavinut tunngassuteqartunik kiisalu puigornermut nappaatinut ilisimasat assigiinngitsut.
Processing Request
No Comments.